តាមសេចក្តីរាយការណ៍ បានឱ្យដឹងថា ក្នុងករណីខាងលើនេះ មានជនរងគ្រោះចំនួន ០២ នាក់ ទី១-ឈ្មោះ កែម កែវកន្និការ ភេទស្រី អាយុ ៣៨ ឆ្នាំ ជនជាតិខ្មែរ មុខរបរគ្រូពេទ្យ មានទីលំនៅបច្ចុប្បន្នភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី (ស្លាប់) និងទី២-ឈ្មោះ ជូ សាណា ភេទស្រី អាយុ ០៦ ឆ្នាំ (ត្រូវជាកូនសព) ជនជាតិខ្មែរ មុខរបរសិស្ស មានទីលំនៅបច្ចុប្បន្នភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី (រងរបួសត្រូវដៃខាងឆ្វេង) ។
សេចក្តីរាយការណ៍ បន្តថា ករណីនេះ បង្កដោយជនសង្ស័យឈ្មោះ សុខា នុត ភេទប្រុស អាយុ ៤១ ឆ្នាំ ជនជាតិព្នង សញ្ជាតិខ្មែរ មុខរបរកសិករ មានទីលំនៅបច្ចុប្បន្នក្រុមពូជូ ភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ដោយប្រើអាវុធ AK 47 ០១ ដើម បង់ចំនួនមួយ និងគ្រាប់ចំនួន ០៦ គ្រាប់ ។
យោងតាមរបាយការណ៍សមត្ថកិច្ច បញ្ជាក់ថា កាលពីថ្ងៃទី១២ ខែឧសភា ឆ្នាំ២០២៤ វេលាម៉ោង ២៣ ៖ ២០ នាទី ជនស្ស័យឈ្មោះ សុខា នុត បានយកកាំភ្លើង AK 47 ០១ ដើម ដែលរើសបានក្នុងព្រៃ ដើរទៅរកនារីរងគ្រោះនៅប៉ុស្តិ៍សុខភាពអណ្ដូងក្រឡឹង មុននឹងចេញទៅរកឆ្លុះសត្វក្នុងព្រៃ ។
ពេលទៅដល់ប៉ុស្តិ៍សុខភាព ដែលនារីរងគ្រោះត្រូវប្រចាំការជាមួយកូនស្រី កំពុងដេកក្នុងបន្ទប់ប៉ុស្តិ៍សុខភាពនោះ ជនសង្ស័យទៅដល់ក៏បានសួរនាំរឿងបាយហូប ហើយក៏ឈ្លោះប្រកែកគ្នា (ដោយអ្នកទាំងពីរត្រូវជាសង្សារនឹងគ្នា) ។
ការឈ្លោះទាស់ទែងគ្នាមួយសន្ទុះ ស្រាប់តែជនបង្ក បានបាញ់សម្លាប់ជនរងគ្រោះ ត្រូវចំក្បាលសៀតផ្កាខាងស្ដាំ ធ្លាយចេញទៅខ្នង ចំណែកក្បាលគ្រាប់បន្តធ្លាយត្រូវចំដៃកុមារីរងគ្រោះឈ្មោះ ជូ សាណា ត្រូវជាកូននារីរងគ្រោះ ចំកំភួនដៃខាងឆ្វេង បណ្ដាលឱ្យរងរបួស ។
ក្រោយជនសង្ស័យឈ្មោះ សុខា នុត បានបាញ់សម្លាញ់នារីរងគ្រោះ ក៏បានបាញ់ខ្លួនឯងចំនួន ០២ គ្រាប់ តែដោយសារគ្រាប់មិនផ្ទុះ ទើបជនសង្ស័យរត់គេចខ្លួនពីកន្លែងកើតហេតុ រហូតដល់ព្រឹកឡើងម៉ោង ០៥ ៖ ៣០ នាទី ថ្ងៃទី១៣ ខែឧសភា ទើបសមត្ថកិច្ចឃាត់ខ្លួនជនសង្ស័យបានតែម្តង ។
បច្ចុប្បន្ន ជនសង្ស័យ ត្រូវបានសមត្ថកិច្ចឃាត់ខ្លួន កសាងសំណុំរឿងបញ្ជូនទៅតុលាការ ដើម្បីចាត់ការតាមនិតិវិធីច្បាប់ ៕
ទីស្នាក់ការយើងខ្ញុំ ផ្ទះលេខ21B ភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ គេហទំព័រ ( WWW.WHITEHORSE-NEWS.COM ) យើងខ្ញុំ ផ្ដល់ព័ត៌មានពិត រហ័ស ច្បាស់លាស់ និងទទួលផ្សព្វផ្សាយពាណិជ្ជកម្ម សូមទំនាក់ទំនងលេខ៖ 078 393 839 / 081 393 839 / 060 393 839 / 031 839 3333 សូមអរគុណ!
No comments:
Post a Comment