ស្ទាវចិត្តខ្លាំង ខឹងម្ដាយខាងស្រីផ្ដាច់ពាក្យ ទាញកាំបិតផ្គាក់កាប់ខាងស្រីរងរបួសធ្ងន់!

(កណ្ដាល) ៖ នៅថ្ងៃទី១៧ ខែមេសា ឆ្នាំ២០២៤ វេលាម៉ោង ១៨ ៖ ១០ នាទី នៅចំណុចឡឥដ្ឋ ភូមិខ្លាត្រាំ ឃុំកំពង់លួង ស្រុកពញាឮ ខេត្តកណ្តាល មានករណីហិង្សាដោយចេតនាមានស្ថានទម្ងន់ទោស បង្កដោយជនសង្ស័យឈ្មោះ​ ផល្លា ទីណា ភេទប្រុស អាយុ ១៨ ឆ្នាំ ជនជាតិខ្មែរ មុខរបរកម្មករឡឥដ្ឋ បានធ្វើសកម្មភាពកាន់កាំបិតផ្គាក់ សំដៅមកកាប់ទៅលើជនរងគ្រោះ ឈ្មោះ ឆុន លីន ភេទស្រី អាយុ ១៧ ឆ្នាំ ជនជាតិខ្មែរ មុខរបរកម្មករឡឥដ្ឋ ចំនួន ០៣ កាំបិត ត្រូវចំក្បាល បណ្តាលឱ្យរងរបួសធ្ងន់ ខណៈដែលជនរងគ្រោះកំពុងជិះម៉ូតូមកពីទិញម្ហូប ។

វត្ថុតាងចាប់យក កាំបិតផ្គាក់ ផ្លែដែក ដងធ្វើពីឫស្សី ប្រវែង ០,៩៥ ម៉ែត្រ ។ រីឯមូលហេតុ ដោយសារជនសង្ស័យ ខឹងនឹងគ្រួសារជនរងគ្រោះ បានផ្តាច់ពាក្យពីខ្លួន ។

បច្ចុប្បន្ន ជនសង្ស័យ រួមតាំងវត្ថុតាង ត្រូវសមត្ថកិច្ចសាងសុំណុំរឿងចាត់ការតាមនីតិវិធី ៕