ឈើប្រណីតមួយរថយន្តសាំយ៉ុង លួចឆ្មក់ចេញពី​ស្រុកសៀមប៉ាង ខេត្តស្ទឹងត្រែង ត្រូវបានអាវុធហត្ថខេត្តចាប់បាន

(ស្ទឹងត្រែង) ៖ លោកមេបញ្ជាការអាវុធហត្ថខេត្តស្ទឹងត្រែង ចង្អុលបង្ហាញឱ្យកម្លាំងអាវុធហត្ថខេត្ត ចាប់រថយន្តសាំយ៉ុង ០១ គ្រឿង ពាក់ផ្លាកលេខ កំពត 3A-3013 ដឹកឈើប្រណីតពេញមួយរថយន្តមានឈើសន្លឹក ១៧ សន្លឹក និងឈើសាឡុង ០១ ឈុត ។

ការចាប់បង្រ្កាបនេះ នៅវេលាម៉ោង ០២ ៖ ៤៤ នាទីរសៀល ថ្ងៃទី០១ ខែវិច្ឆិកា ឆ្នាំ២០២៣នេះ នៅចំណុចច្រកចូលខេ ភូមិគីឡូ៨ សង្កាត់សាមគ្គី ក្រុងស្ទឹងត្រែង និងនាំយកឈើ និងរថយន្តបម្រើបទល្មើសមកទីបញ្ជាការអាវុធហត្ថខេត្ត និងបញ្ជូនបន្តទៅរដ្ឋបាលព្រៃឈើស្ទឹងត្រែង ។

លោកឧត្តមសេនីយ៍ អៀង វ៉ាន់ឌី មេបញ្ជាការអាវុធហត្ថខេត្ត បានឱ្យដឹងថា ឈើមួយរថយន្តដែលចាប់បាន គឺបម្រុងដឹកទៅលក់នៅស្រុកឆ្លូង ខេត្តក្រចេះ មានចំនួនជាង ០១ ម៉ែត្រគូប មានឈើសន្លឹក ១៧ សន្លឹក និងឈើសាឡុង ០១ ឈុត ដែលឈើសាឡុងដឹកយកទៅបាញ់ថ្នាំនៅស្រុកឆ្លូង ខេត្តក្រចេះ ដើម្បីលក់ចេញ ៕