ស្ទាក់ចាប់រថយន្តកែឆ្នៃ១គ្រឿង ដឹកអុសស្វាយចន្ទី បង្កប់ឈើប្រណីតខុសច្បាប់ ត្រៀមដឹកជញ្ជូនឈើឆ្លងតាមច្រកទ្វេភាគីព្រំដែនជ័យឃ្លាំង “ហៅជោះជ្រៅ” ទៅលក់ឱ្យវៀតណាម

(ក្រចេះ) ៖ នៅថ្ងៃទី២៩ ខែតុលា ឆ្នាំ២០២៣ កម្លាំងសមត្ថកិច្ចចម្រុះស្រុកស្នួល បានចុះស្ទាក់ចាប់រថយន្តកែច្នៃដឹកបទល្មើសព្រៃឈើមួយ ០១ គ្រឿង ដែលដឹកអុសមែកស្វាយចន្ទីពីលើ នឹងផ្ទុកឈើប្រណីតខុសច្បាប់នៅផ្នែកខាងក្រោម ។

ប្រតិបត្តិការស្ទាក់ចាប់នេះ ស្ថិតនៅចំណុចភូមិគ្រញូងសែនជ័យជើង ឃុំគ្រញូងសែនជ័យ ស្រុកស្នួល ខេត្តក្រចេះ ។ គោយន្តកែច្នៃដឹកបទល្មើសព្រៃឈើខាងលើនេះ បើយោងតាមសេចក្តីរាយការណ៍ បានឱ្យដឹងថា ឈើខុសច្បាប់ខាងលើ ឈ្មួញបានដឹកជញ្ជូនបម្រុងត្រៀមឆ្លងដែនទៅប្រទេសវៀតណាម តាមច្រកទ្វារទ្វេភាគីជ័យឃ្លាំង "ហៅច្រកព្រំដែន កម្ពុជា-វៀតណាម ជ្រោះជ្រៅ" ។

ក្រោយពីសមត្ថកិច្ចធ្វើការបង្ក្រាប គោយន្តកែច្នៃដឹកឈើខុសច្បាប់ខាងលើនេះ ត្រូវបានរឹបអូសវត្ថុតាង ឈើ និងគោយន្តច្នៃទាំងនេះ យកទៅរក្សាទុកនៅផ្នែករដ្ឋបាលព្រៃឈើស្រុកស្នួល ខេត្តក្រចេះ ដើម្បីចាត់ការបន្តទៅតាមនីតិវិធីច្បាប់ ៕