(ភ្នំពេញ) ៖ អាព្យាបាល និងក្មេងសិស្សសាលា “សុវណ្ណភូមិ” ០២ នាក់ ដែលបានវាយគ្នា ហើយថតវីដេអូបង្ហោះនៅក្នុងបណ្តាញសង្គម ត្រូវបានកម្លាំងនគរបាលប៉ុស្តិ៍ទួលសង្កែទី១ និងនគរបាលខណ្ឌឫស្សីកែវ កោះអញ្ជើញមកសម្របសម្រួល និងឱ្យក្មេងស្រីបង្ក សុំទោសជាសាធារណៈ កាលពីរសៀលថ្ងៃទី២៥ ខែតុលា ឆ្នាំ២០២៣ នេះបើតាម សេចក្តីបំភ្លឺព័ត៌មានរបស់ក្រុមការងារព័ត៌មាន និងប្រតិកម្មរហ័ស របស់ស្នងការដ្ឋាននគរបាលរាជធានីភ្នំពេញ ។
តាមសេចក្តីបំភ្លឺ បានឱ្យដឹងថា បន្ទាប់ពីបានឃើញព័ត៌មានមានករណីទំនាស់បន្តិចបន្ទួចរវាងសិស្ស និងសិស្សក្នុងសាលារៀនរួចមក នៅថៃ្ងទី២៥ ខែតុលា ឆ្នាំ២០២៣ វេលាម៉ោង ១៤ ៖ ៣០ នាទី កម្លាំងប៉ុស្តិ៍នគរបាលរដ្ឋបាលទួលសងែ្ក១ បានអញ្ជើញអាណាព្យាបាលសិស្សទាំងសងខាង ដើម្បីសាកសួរ ។
ដោយមានការសម្របសម្រួលពីកម្លាំងប៉ុស្តិ៍នគរបាលរដ្ឋបាលទួលសងែ្ក១ ខាងអាណាព្យាបាលក្មេងបង្ក និងក្មេងស្រីបង្ក បានធ្វើការសុំទោសជាសាធារណៈ និងសុំការអធ្យាស្រ័យ ពីអាណាព្យាបាលខាងក្មេងរងគ្រោះ ។ ភាគីទាំងពីរ ក៏មានការយោគយល់ និងអធ្យាស្រ័យគ្នា និងដោយយោងក្មេងបង្ក នៅអនីតិជន និងនៅកំពុងសិក្សាផងនោះ សមត្ថកិច្ចបានធ្វើការអប់រំ ណែនាំ និងធ្វើកិច្ចសន្យា មិនឱ្យមានករណីអំពើហិង្សាបន្តទៀតនោះទេ និងបានអនុញ្ញាតឱ្យត្រឡប់ទៅវិញ ដើម្បីឱ្យអាណាព្យាបាលអប់រំបន្ត ។
គួរបញ្ជាក់ថា កាលពីវេលាម៉ោងប្រមាណ ១២ ៖ ៣០ នាទីថ្ងៃត្រង់ ថ្ងៃទី២១ ខែតុលា ឆ្នាំ២០២៣ មានករណីសិស្ស សាលាសុវណ្ណភូមិ ០២ នាក់ មានទំនាស់គ្នានៅក្នុងសាលា ដែលស្ថិតនៅតាមបណ្តោយផ្លូវលេខ៩០៧ ក្រុមទី១៤ ភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ ។
នៅក្នុងទំនាស់គ្នានេះ ក្មេងស្រីបង្ក អាយុ ១៤ ឆ្នាំ បានវាយទៅលើ ក្មេងស្រី អាយុ ១៣ ឆ្នាំ ជាច្រើនដៃ ហើយអោយសុំទោស ។ ទន្ទឹមនោះ ក៏បានថតបង្ហោះ និងមានការចែករំលែកបន្តគ្នានៅក្នុងបណ្តាញ ក៏ត្រូវបានសមត្ថកិច្ច អញ្ជើញមកសម្របសម្រួលគ្នា ដើម្បីបញ្ចប់រឿងតែម្តង ៕
ទីស្នាក់ការយើងខ្ញុំ ផ្ទះលេខ21B ភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ គេហទំព័រ ( WWW.WHITEHORSE-NEWS.COM ) យើងខ្ញុំ ផ្ដល់ព័ត៌មានពិត រហ័ស ច្បាស់លាស់ និងទទួលផ្សព្វផ្សាយពាណិជ្ជកម្ម សូមទំនាក់ទំនងលេខ៖ 078 393 839 / 081 393 839 / 060 393 839 / 031 839 3333 សូមអរគុណ!
No comments:
Post a Comment