សម្ដេចនាយករដ្ឋមន្រ្តី ហ៊ុន ម៉ាណែត បញ្ជាឱ្យយកងយោធពលខេមរភូមិន្ទពិនិត្យឡើងវិញ ចំពោះការជ្រើសរើសក្របខ័ណ្ឌកងទ័ព ខណៈនាយទាហានច្រើនជាងពលទាហាន

(​ភ្នំពេញ) ៖ សម្តេចនាយករដ្ឋមន្រ្តី ​ហ៊ុន ម៉ាណែត បានថ្លែងថា បច្ចុប្បន្ន កម្ពុជាមាននាយទាហាន ច្រើនជាងពលទាហាន។ ដូច្នេះក្រសួងការពារជាតិ ក៏ដូចជាកងយោធពលខេមរភូមិន្ទ ត្រូវពិនិត្យ និងធ្វើការសិក្សាឡើងវិញ ចំពោះការជ្រើសរើស ក្របខ័ណ្ឌកងទ័ព។ មួយទៀតសោត ត្រូវកាត់បន្ថយការជ្រើសរើស និងដំឡើង​ឋានន្តរស័ក្ដិ​ថ្នាក់នាយទាហាន ដោយត្រូវបង្កើនពលទាហានវិញ។

«កន្លងមក សង្កេតឃើញថា​ ការបណ្ដុះបណ្ដាល​នាយទាហាន​មាន​អត្រាខ្ពស់ជាងការ​បណ្ដុះបណ្ដាល​ពលទាហាន ហើយពេល​ដែលមាននាយទាហាន​ច្រើនពេក វានឹងធ្វើឲ្យប៉ះពាល់​ដល់​ការ​តែងតាំង​តួនាទី​នាយទាហាន​ទាំងនោះផង​។ ហើយមួយវិញទៀត​ការធ្វើការកំណែ​ទម្រង់បែបនេះ​ ក៏កាត់បន្ថយការ​ចំណាយ​ថវិកា​របស់ជាតិដែរ»។ នេះជាប្រសាសន៍របស់សម្តេចធិបតី ​ហ៊ុន ម៉ាណែត។

ការថ្លែងបែបនេះរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញជួបសំណេះសំណាល ជាមួយលោកគ្រូ អ្នកគ្រូជាង២ពាន់នាក់ ដើម្បី​អបអរសាទរអបអរសាទរ ទិវាគ្រូបង្រៀនពិភពលោក ​ក្រោមប្រធានបទ«គ្រូបង្រៀន ជាសសរស្តម្ភនៃសាលារៀនឆ្ពោះទៅរកឧត្តមភាព» ​នាព្រឹកថ្ងៃទី៥ ខែតុលា ឆ្នាំ២០២៣​ នៅវិទ្យាស្ថានបច្ចេកកម្ពុជា​។

ក្នុងគ្រោះនោះដែរ សម្តេច​នាយករដ្ឋមន្ត្រី នៃកម្ពុជា ក៏បានណែនាំឲ្យពង្រឹងស្ថាប័ន មើលតួនាទីរចនាសម្ព័ន្ធ ហើយត្រូវពិនិត្យមើលក្របខ័ណ្ឌ តើមានខ្វះ ឬលើស? មុននឹងស្នើសុំជ្រើសរើសមន្ត្រីរាជការបន្ថែម។ ពីព្រោះដើម្បីសន្សំថវិកា ជាជាងរើសមន្ត្រីថ្មី យកថវិកានេះបង្កើនលើកទឹកចិត្ត អ្នកដែលមានស្រាប់ល្អជាង។ ​

សម្ដេចធិបតី ​បានលើកឡើងថា សម្ដេច បានផ្ដល់គោលការណ៍ឲ្យក្រសួងមុខងារសាធារណៈរួចហើយ ពាក់ព័ន្ធនឹងការជ្រើសរើសមន្ត្រីរាជការ នៅតាមក្រសួង-ស្ថាប័ននានា ដោយវាយតម្លៃឡើងវិញ។ ក្នុងនោះ មិនត្រូវជ្រើស រើសមន្ត្រីរាជការ ដោយផ្អែកលើឆ្នាំចាស់ឡើយ តែដល់ពេលត្រូវផ្អាកមួយរយៈ ដើម្បីវាយតម្លៃឡើងវិញ។

បើតាមសម្តេច​នាយករដ្ឋមន្ត្រី, រាជរដ្ឋាភិបាលសន្សំថវិកាបានជាង ២០០លានដុល្លារ បន្ទាប់ពីព្យួរការចំណាយលើកិច្ចការមិនសំខាន់មួយចំនួន ដែលថវិកាទាំងនោះសម្រាប់យកទៅជួយសង្គ្រោះប្រជាពលរដ្ឋជួបគ្រោះធម្មជាតិ​ទឹកជំនន់ និង​គាំពារសង្គមជាដើម៕