(បរទេស) ៖ ចំនួនជនជាតិថៃស្លាប់ក្នុងជម្លោះនៅអ៊ីស្រាអែលបានកើនដល់ ១៨នាក់ ហើយកម្មករជាង ៣.០០០នាក់ បានសុំវិលមកស្រុកថៃវិញ នេះបើតាមការបញ្ជាក់ពីអនុរដ្ឋមន្ត្រីការបរទេសថៃ លោក ចាក់កាពង់ សាងម៉ានី (Jakkapong Sangmanee) កាលពីថ្ងៃអង្គារទី១០ ខែតុលា ឆ្នាំ២០២៣ ។
វាបានកើនពីចំនួន ១២នាក់ ដែលមន្ត្រីថៃបានអះអាងកាលពីថ្ងៃចន្ទ នៅពេលព័ត៌មានស្តីពីការវាយប្រហាររបស់ក្រុមសកម្មប្រយុទ្ធហាម៉ាសកាន់តែលេចចេញមកច្រើនទៀតនាំឱ្យចំនួនមនុស្សស្លាប់នៅខាងអ៊ីស្រាអែលឡើងដល់ជាង ៩០០នាក់ ។
បើតាមឯកអគ្គរដ្ឋទូតថៃប្រចាំអ៊ីស្រាអែល គិតត្រឹមថ្ងៃអង្គារម្សិលមិញមានជនជាតិថៃ ៣.៨៦២នាក់ បានសុំវិលមកស្រុកវិញ នៅពេលជនជាតិថៃក្រុមដំបូងមានគ្នា ១៥នាក់ នឹងមកដល់ថៃនៅថ្ងៃព្រហស្បតិ៍ ទី១២ ខែតុលា និងក្រុមទីពីរប្រហែលជាមកដល់ថ្ងៃ១៩ ខែតុលា ។ ទោះជាយ៉ាងណាលោកស្រីបាននិយាយថា មានអ្នកខ្លះចង់បន្តរស់នៅអ៊ីស្រាអែល ។
មន្ត្រីថៃឥឡូវកំពុងត្រៀមរៀបចំផែនការជម្លៀសពលរដ្ឋខ្លួនចេញពីអ៊ីស្រាអែលដោយកំពុងពិចារណាប្រើទាំងយន្តហោះទ័ពអាកាសនិងយន្តហោះឈ្នួលដើម្បីនាំពួកគេមកស្រុកវិញ។
លោកអនុរដ្ឋមន្ត្រីការបរទេសក៏បាននិយាយថា មន្ត្រីថៃកំពុងខិតខំទាក់ទងរកវិធីរំដោះជនជាតិថៃដែលក្រុមហាម៉ាសចាប់ជាចំណាប់ខ្មាំង ។ របាយការណ៍កាលពីថ្ងៃចន្ទបាននិយាយថា ជនជាតិថៃ ១១នាក់ ត្រូវបានបានចាប់ជាចំណាប់ខ្មាំង ។
ឯកអគ្គរដ្ឋទូតថៃប្រចាំអ៊ីស្រាអែល បានបញ្ជាក់ថា គេនៅតែមិនទាន់ដឹងថាតើចំណាប់ខ្មាំងថៃត្រូវរក្សាទុកនៅទីណា តែលោកស្រីបានធ្វើការជាមួយអាជ្ញាធរអ៊ីស្រាអែលដើម្បីធានាការដោះលែងពួកគេ ។
ពលរដ្ឋថៃ១១នាក់ ក្នុងចំណោមមនុស្សជិត១៥០នាក់ត្រូវពួកហាម៉ាសចាប់ពីអ៊ីស្រាអែលនាំទៅកាន់ហ្កាហ្សាដើម្បីទុកជាចំណាប់ខ្មាំង ។
មុននេះ ឯកអគ្គរដ្ឋទូតអ៊ីស្រាអែលប្រចាំថៃបានសន្យាថា កម្មករថៃនឹងទទួលបានការគាំពារដូចពលរដ្ឋអ៊ីស្រាអែលដែរ នៅពេលការប្រយុទ្ធគ្នារវាងអ៊ីស្រាអែលនិងពួកហាម៉ាសកាន់តែខ្លាំងក្លាឡើង ។
យោងតាមក្រសួងការងារ មានកម្មករថៃប្រហែល ២៥.០០០នាក់ នៅក្នុងទីប្រជុំជនអ៊ីស្រាអែលចំនួន១២ ។
ថៃក៏កំពុងធ្វើការជាមួយអាជ្ញាធរប្រទេសហ្សកដានី អេហ្ស៊ីបនិងម៉ាឡេស៊ី ដើម្បីធានាការដោះលែងពលរដ្ឋខ្លួន ខណៈកម្មករថៃជាង៣ពាន់នាក់កំពុងសុំវិលមកស្រុកវិញ ៕
ទីស្នាក់ការយើងខ្ញុំ ផ្ទះលេខ21B ភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ គេហទំព័រ ( WWW.WHITEHORSE-NEWS.COM ) យើងខ្ញុំ ផ្ដល់ព័ត៌មានពិត រហ័ស ច្បាស់លាស់ និងទទួលផ្សព្វផ្សាយពាណិជ្ជកម្ម សូមទំនាក់ទំនងលេខ៖ 078 393 839 / 081 393 839 / 060 393 839 / 031 839 3333 សូមអរគុណ!
No comments:
Post a Comment