(ភ្នំពេញ) ៖ បុរសម្នាក់ បានដាច់ខ្យល់ស្លាប់នៅមុខបន្ទប់ជួលរបស់ប្រពន្ធ ខណៈពេលជិះរថយន្តតាក់ស៊ីត្រឡប់មកពីស្រុកវិញ ហើយក៏បានចុះពីលើរថយន្តបានរត់ចុះរត់ឡើងពេញផ្លូវ ព្រោះគាត់មានសភាពមិនស្រួលក្នុងខ្លួន កាលពីវេលាម៉ោង ០៣ និង ៥០នាទីរសៀល ថ្ងៃទី៩ ខែតុលា ឆ្នាំ២០២៣ ស្ថិតនៅផ្លូវបេតុង ផ្សារដីថ្មី ភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។
សពជនរងគ្រោះខាងលើមានឈ្មោះ ជឹម ចន្ធី អាយុ ៣៩ឆ្នាំ មុខរបរជាងពីដាន មានស្រុកកំណើតនៅស្រុកពាមជរ ខេត្តព្រៃវែង ស្នាក់នៅជាមួយប្រពន្ធនៅម្ដុំកន្លែងកើតហេតុ ។
យោងតាមការឱ្យដឹងពីប្រពន្ធរបស់ជនរងគ្រោះ បានបញ្ជាក់ថា ជនរងគ្រោះមានជំងឺប្រចាំកាយ ហើយឧស្សាហ៍ប្រកាច់ជាប្រចាំ ។ នៅមុនពេលកើតហេតុ ប្តីរបស់គាត់បានជិះរថយន្តតាក់ស៊ីត្រឡប់មកពីលេងស្រុកកំណើតវិញនៅឯខេត្តព្រៃវែង ចំណែករូបគាត់កំពុងតែធ្វើការនៅក្នុងរោងចក្រ ។ មុនពេលកើតហេតុ គេឃើញបុរសខាងនេះចុះពីលើរថយន្តតាក់ស៊ីហើយមានអាការៈដូចជាក្អួតចង្អោទើបរូបគាត់ប្រឹងរត់ចុះរត់ឡើងពេញផ្លូវបង្កឱ្យមានការភ្ញាក់ផ្អើល ។ មួយសន្ទុះក្រោយមកក៏បានរត់ចូលក្រោមកាំជណ្តើរផ្ទះជួល ហើយក៏បានប្រកាច់ដាច់ខ្យល់ស្លាប់តែម្ដង ។
ក្រោយពេលកើតហេតុ សមត្ថកិច្ចក៏បានចុះមកធ្វើការពិនិត្យ និងធ្វើកំណត់ហេតុប្រគល់សពជនរងគ្រោះទៅឱ្យក្រុមគ្រួសារ ៕
No comments:
Post a Comment