សមត្ថកិច្ច និងមន្ត្រីជំនាញ ចុះបង្រ្កាបបទល្មើសនេសាទនៅចំណុចភូមិសាស្ត្រផាត់សណ្តាយ ស្រុកកំពង់ស្វាយ ដែលមានបទល្មើសកើតពេញបន្ទុក និងបង្ក្រាបមិនចេះអស់

(កំពង់ធំ) ៖ បើទោះបីបទល្មើសនេសាទត្រូវបានគេមើលឃើញថា មានការចុះបង្គ្រាបជាបន្តបន្ទាប់ក៏ដោយ ប៉ុន្តែបទល្មើសមួយនេះ នៅតែបន្តកើតឡើងគ្រប់រូបភាព ជាក់ស្ដែងនៅថ្ងៃទី ០៦ ខែតុលា ឆ្នាំ ២០២៣ ក្រុមការងារបង្ក្រាបបទល្មើសនេសាទបឹងទន្លេសាប ឈរជើងនៅចំណុចផាត់សណ្តាយ ស្រុកកំពង់ស្វាយ ខេត្តកំពង់ធំ ដឹកនាំដោយលោកឧត្តមសេនីយ៍ត្រី វ៉ា ចាន់កុសល ស្នងការរង និងជាប្រធានក្រុមការងារ ព្រមទាំងសហការរី បានចេញប្រតិបត្តិការត្រួតពិនិត្យ និងបង្រ្កាបបទល្មើសនេសាទនៅចំណុច ក្រោយវត្តកំពង់ចម្លង ទួលតាទី និងបឹងកំភ្លាញតូច ក្នុងភូមិសាស្ត្រឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ។

លោក វ៉ា ចាន់កុសល ស្នងការរងខេត្តកំពង់ធំ បានឲ្យដឹងថា ការបង្រ្កាបបទល្មើសលើផ្ទៃបឹងទន្លេសាប ដែលមានជាលក្ខណៈទ្រង់ទ្រាយធំ ក្នុងនោះទទួលបានលទ្ធផលគឺ បង្កសំណុំរឿងបានចំនួន ១ករណី៖ បានចុះរុះរើបំផ្លាញចោលវត្ថុតាងនៅនឹងកន្លែងរួមមាន៖ របាំងសាច់អួនប្រវែង ១.៥០០ម៉ែត្រ ឡុកចំនួន ១០គ្រឿង លប/លូចំនួន ២០មាត់ បង្គោលចំនួន ១.០០០ដើម ចាក់លែងត្រីស្រស់ចម្រុះទម្ងន់ ១៥គីឡូក្រាមចូលទន្លេវិញ ។

លោក ក៏បានអំពាវនាវដល់ប្រជានេសាទទាំងអស់ ត្រូវមានការប្រុងប្រយ័ត្នខ្ពស់ចំពោះការនេសាទដែលប្រើប្រាស់ជាលក្ខណៈទ្រង់ទ្រាយធំ និងហួសដែនកំណត់ ត្រូវមានការទទួលខុសត្រូវខ្ពស់ ចំពោះមុខរបររបស់ខ្លួននៅតាមទីតាំង ណាមួយក្នុងបឹងទន្លេសាប ។

សូមបញ្ជាក់ផងដែរថា ភូមិសាស្ត្រឃុំផាត់សណ្ដាយ ត្រូវបានគេចាត់ទុកថា ជាតំបន់ក្ដៅមួយដែលពោពេញដោយបទល្មើសនេសាទ ដែលមានរចនាសម្ព័ន្ធ និងទ្រង់ទ្រាយធំ និងមានមេខ្យល់រត់ការជាកញ្ចប់ ៕