Thursday, October 19, 2023

ទំព័រដើម ព័ត៌មានសន្តិសុខសង្គម បុរសមានវ័យចំណាស់ម្នាក់ ដែលស្គាល់ថាអតីតមន្ត្រីនគរបាលអន្តោប្រវេសន៍ ស្លាប់ក្នុងបន្ទប់ទឹករហូតហើមស្អុយ

បុរសមានវ័យចំណាស់ម្នាក់ ដែលស្គាល់ថាអតីតមន្ត្រីនគរបាលអន្តោប្រវេសន៍ ស្លាប់ក្នុងបន្ទប់ទឹករហូតហើមស្អុយ

October 19, 2023 ព័ត៌មានសន្តិសុខសង្គម,

(ភ្នំពេញ) ៖ បុរសចំណាស់ម្នាក់អតីតជានគរបាលអន្តោប្រវេសន៍ បច្ចុប្បន្នបានចូលនិវត្តន៍ទៅហើយ គាត់បានរស់នៅក្នុងផ្ទះមួយតែម្នាក់ឯង ចំណែកឯប្រពន្ធ និងកូនៗរស់នៅផ្ទះផ្សេងៗ ហើយសង្ស័យខ្យល់គ ដួលស្លាប់ក្នុងបន្ទប់ទឹកអស់រយៈពេល ០៣ថ្ងៃ រហូតហើមស្អុយទើបត្រូវបានកូនៗដឹង ។

ហេតុការណ៍នេះ បានបង្កឱ្យមានការភ្ញាក់ផ្អើល កាលពីវេលាម៉ោង ១០ព្រឹក ថ្ងៃទី១៩ ខែតុលា ឆ្នាំ២០២៣ នៅក្នុងភូមិចោមចៅ៣ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។

សពបុរសរងគ្រោះមានឈ្មោះ ហួរ ណារ៉ុង អាយុ ៦៣ឆ្នាំ អតីតជាមន្ត្រីនគរបាលអន្តោប្រវេសន៍ តែបច្ចុប្បន្នបានចូលនិវត្តន៍ហើយ គាត់រស់នៅក្នុងផ្ទះកើតហេតុនោះតែម្នាក់ឯងប៉ុណ្ណោះ ដោយសារកូនប្រុសរបស់គាត់ម្នាក់រស់នៅឯខណ្ឌច្បារអំពៅ ចំណែកប្រពន្ធ និងកូន ០២នាក់ទៀតរស់នៅផ្ទះឯខេត្តសៀមរាប ទើបពេលគាត់មានគ្រោះថ្នាក់កើតឡើងពុំមានអ្នកដឹងភ្លាមៗឡើយ ។

កូនប្រុសរបស់សពរងគ្រោះម្នាក់ បានប្រាប់ឱ្យនគរបាលដឹងថា កន្លងមកដោយសារតែឃើញឪពុកចាស់ហើយ រស់នៅតែម្នាក់ឯងបែបនេះធ្វើឱ្យកូនៗមានការព្រួយបារម្ភខ្លាំងណាស់ ហើយខ្លួនក៏ធ្លាប់ប្រាប់ឱ្យលោកឪពុកលក់ផ្ទះហ្នឹងទៅ ហើយទៅរស់នៅជាមួយប្រពន្ធ និងកូនវិញ ។ ប៉ុន្តែលោកឪពុកមិនព្រមឡើយដោយគាត់ប្រាប់ថាស្ដាយផ្ទះដែលធ្លាប់រស់នៅច្រើនឆ្នាំមកហើយ មិនចង់លក់ទេ សុខចិត្តស៊ូទ្រាំរស់នៅម្នាក់ឯង ហើយពេលលោកឪពុកមិនយល់ព្រមលក់បែបនេះ កូនៗក៏ពុំដឹងថាត្រូវធ្វើបែបណាទេ មានតែតាមចិត្តគាត់ទៅចុះ ។

ប្រភពដដែលនេះ បានប្រាប់ឱ្យដឹងបន្តទៀតថា នៅមុនពេលកើតហេតុ លោកឪពុកបានទៅលេងផ្ទះឯខេត្តសៀមរាបប៉ុន្មានថ្ងៃដែរ ហើយទើបត្រឡប់មកផ្ទះកើតហេតុបានរយៈពេល ០៤ថ្ងៃប៉ុណ្ណោះ ។ ដោយឡែកកាលពីថ្ងៃទី១៦ ខែតុលា ឆ្នាំ២០២៣ កូនៗបាននាំគ្នារទូសព្ទសាកសួរសុខទុក្ខដែរ ប៉ុន្តែខលចូលលោកឪពុកមិនលើកសោះ ហើយដោយជាប់រវល់ធ្វើការងារផង និងមិនចាប់អារម្មណ៍ថាលោកឪពុកមានគ្រោះថ្នាក់ផង ទើបមិនបានទៅមើលផ្ទាល់ឡើយ ។ លុះមកដល់ព្រឹកថ្ងៃទី១៩ ខែតុលា បានទូរសព្ទទៅកាន់លោកឪពុកជាថ្មីនៅតែមិនលើកទៀត ទើបទៅមើលដល់ផ្ទះខណៈនោះឃើញផ្ទះជាន់ផ្ទាល់ដីចាក់សោពីក្នុង ចំណែកទ្វារជាន់លើចំហរ ក៏សុំផ្ទះអ្នកជិតខាងឆ្លងចូលទៅមើល ស្រាប់តែធុំក្លិនស្អុយ ហើយប្រទះឃើញលោកឪពុកដេកស្លាប់ក្នុងបន្ទប់ទឹកហើមស្អុយបាត់ទៅហើយ ។

ក្រោយពេលកើតហេតុ កូនៗបានរាយការណ៍ជូននគរបាលប៉ុស្តិ៍ចោមចៅទី២ ឱ្យចុះទៅពិនិត្យមើលហើយនគរបាលប៉ុស្តិ៍ខាងលើ បានរាយការណ៍បន្តទៅកាន់នគរបាលការិយាល័យបច្ចកទេសវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ចុះទៅធ្វើការពិនិត្យកោសល្យវិច័យ ហើយលទ្ធផលនគរបាលរកឃើញថា បុរសរងគ្រោះរូបនេះស្លាប់ដោយសារគាំងបេះដូង រួចប្រគល់សពជូនក្រុមគ្រួសារធ្វើបុណ្យតាមប្រពៃណី ៕